എം.ഡി. രത്‌നമ്മ

തിരുവല്ലയിൽ ജനനം.കവിയും രാഷ്ട്രീയപ്രവർത്തകനുമായിരുന്ന പൊൻകുന്നം ദാമോദരന്റെയും കുഞ്ഞിക്കുട്ടി യമ്മയുടെയും മകൾ. ഹിന്ദിയിൽ എം.എ. ബിരുദം. തുടർന്ന് കോളേജ് അധ്യാപിക. ശാസ്താംകോട്ട ദേവസ്വം ബോർഡ് കോളേജിൽ ഹിന്ദി വിഭാഗം മേധാവിയായി 1999-ൽ ഔദ്യോഗികജീവിതത്തിൽനിന്ന് വിരമിച്ചു.

എഴുപതുകളിലും എൺപതുകളിലും മലയാള ചെറുകഥ നോവൽ രംഗത്തെ ശ്രദ്ധേയ വനിതാസാന്നിധ്യം.

24 നോവലുകൾ പുസ്തകരൂപത്തിൽ പുറത്തുവന്നു. അറുപതിലേറെ കഥകളും പ്രസിദ്ധപ്പെടുത്തിയിട്ടുണ്ട്. മൂന്നു നോവലുകൾ ചലച്ചിത്രങ്ങളായിട്ടുണ്ട്. സ്ത്രീകഥാപാത്രങ്ങൾക്ക് പ്രാധാന്യം നൽകി ഭൂരിഭാഗം രചനകളും. സാഹിത്യരംഗത്തെ സമഗ്രസംഭവനകൾക്ക് 2013-ൽ കേരള സാഹിത്യ അക്കാദമി പുരസ്‌കാരം ലഭിച്ചു.

കൃതികൾ: അരണ്യവാസം, ആത്മഹത്യാ മുനമ്പ്, കോവളം, ശിശിരം, ശൈത്യം, ദ്രൗപദി, വൃന്ദക്ക് സുഖം തന്നെ (നോവലുകൾ), അപർണ, എന്റെ പ്രിയകഥകൾ (കഥാസമാഹാരങ്ങൾ). 2011 മുതൽ തൃശ്ശൂരിൽ സ്ഥിരവാസം.