Mazhavillavatte

മഴവില്ലാവട്ടെ

ഡോ. ഷൊർണൂർ കാർത്തികേയൻ‌

മഴവില്ലാവട്ടെ എന്ന കാവ്യസമാഹാരത്തിന്റെ ഉള്ളിലേക്കു പ്രവേശിക്കുമ്പോൾ, ലാളിത്യപൂർണ്ണമായ ഒരാനന്ദമോ വിമർശനാത്മകമായ ഒരു തെളിഞ്ഞ ചിരിയോ അനുഭൂതിസാന്ദ്രമായ ഒരു സൗന്ദര്യമണ്ഡലമോ ആത്യന്തികമായ സത്യദർശനമോ ലഭിക്കുന്നു. അടിതെളിഞ്ഞ നല്ല മലയാള ഭാഷയിലെഴുതപ്പെട്ടവയാണ് ഈ സമാഹാരത്തിലെ കവിതകളത്രയും. ലളിതസുഭഗങ്ങളായ കാവ്യാലങ്കാര ഭംഗികളാൽ സമ്പുഷ്ടമാണ് ഓരോരചനയും. പദസംയോഗങ്ങളിലും ബിംബസ്വീകരണത്തിലും ശില്പസൗകുമാര്യത്തിലും കൈത്തഴക്കമുള്ള നല്ല ഒരു കവിയുടെ കയ്യൊപ്പ് ഇതിൽ തെളിഞ്ഞു കാണാം.

ആലങ്കോട് ലീലാകൃഷ്ണൻ

മനുഷ്യജീവിതത്തിന്റെ ഈ യാത്രയുടെ അകവും പുറവും തേടലും മരണമെന്ന യാഥാർത്ഥ്യത്തെക്കുറിച്ചുള്ള ചിന്തകളും ഒരു മിസ്റ്റിക്കിന്റെ ചിന്താധാരയിൽനിന്നും ഉയിർക്കൊണ്ട സൂക്ഷ്മവും പഠനാർഹവുമായ പദാവലികൾകൊണ്ട് സമ്പന്നമാണ് ഈ കവിതകൾ. എന്നിരുന്നാലും ജീവിതത്തോടുള്ള അടങ്ങാത്ത ആഗ്രഹവും പ്രത്യാശയും കൈവിടാനൊരുക്കമല്ല എന്ന് പറയാതെ പറയുന്ന രചനകളും ഈ കവിതാ  സമാഹാരത്തിൽ കാണാൻ കഴിയും.

ഗിന്നസ് സത്താർ ആദൂർ